Nunha contorna de petróglifos e pegadas arqueolóxicas e históricas celébrase unha das romarías máis antigas de Galicia e a única que se desenvolve de xeito ininterrompido dende 1756 (no 2020 a pandemia do covid-19 obrigou a suprimir verbenas e limitar outras actividades). A romaría de San Ramón de Bealo cita ás e aos boirenses cada 31 de agosto a unha xornada campestre no Campo dos Outeiriños, con comida, viño e orquestras como reclamos. Pero a auténtica singularidade desta festa radica na condición do santo de patrón das parturientas. As mulleres acoden á ermida de San Ramón na busca dun parto feliz ou dun próximo embarazo, cunha notable e vistosa concentración de veciñas encinta na procesión. A romaría está vinculada a ritos pagáns ligados á fecundidade desde tempos inmemoriais, como se pode constatar á vista dalgún gravado con forma de serpe, símbolo da fertilidade.